ЭВ: Ванна тестэ: Эрзя раськесь ули, ковкерькст эрзянь арасельть. Республика Мордовиясь раскенек ванстомадо ансяк пары, мезтькак а тейни. Кода васенцеде тов пачкодинь, варштынь, - абунгадынь: валтнэде - улав, тевтнеде - бабань пеште. Сынь мельс: эряви мезтькак тейнемс. Истя сынь те тевентень. Ней теян ветеце ковкерьксэнть. Васенцесь ульнесь зепень ковкерькс. Мазы лись пакшинесь!
? – Вежай-леляй, кавто валсо - кодамо карми 2007 иень ковкерьксенек? Зняро лопасо, кодамо тиражось(ламось)?
ЭВ: 2007 иень ковкерьксесь алтави Раськень Озксонтень. "Эрзянь Мастор" кулялопась теде сёрмадсь седе ламосто, тонь Эрий журналсонть икеле сермадовкснесе ульнесь теде пачтязь. Ловнодо эрзят. Ковкерьксенек карми вейке лопасо: А-3 сравтовкссо. Ламоксчизэ: атятне вешить 1,5 тёжат. Ламо? Ансяк эрзятнеде седее ламо. Рамсевельть- путовольть эрьва кудос, паро тевесь улевель.
? – Нолдамс зняро тежат ауль шожда питне тев. Кие лезды нолдамондо? Кува карми микшневеме? Косто эрзятнене саеменде?
ЭВ: Нолдамозонзо пурнынек ярмакт тесэнь финно-угратне - пельтёжашка, алтась кучомо 1000 ц. Кузоватонь Одай Новокузнецк ёндо, лиятнень каясынь монсь. Микшневеме карми ковкерьксесь "Эрзянь Мастор" кулялопанок вельде. Сермадодо тов эрзят, финно-угрань ялгат, - карматад ковкерькс марто!
? – Ёвтака Вежай, мезекс тонь коряс эряви кудосо ковкерьксесь эрзятнене? Варштазеват лавкатнева улить ламо эрьва-кодат рузонь ковкерькст: шумбрачинь, видема, ковонь, пазонь кемемань, ды седе тов койтнеде…
ЭВ: Лисни, эряви. Монсь неинь, кода омбоце ковкерьксэнть вейке эрзянь велень кудосо сыре эрзянь авась мик пазаватнень ваксс понгавтызе. Истя мелезэнзэ тусь! Николай Угодникенть ваксс!! Вана кодамо виезэ эрзянь ковкерьксэнть! А видсте ёвтамондо – эрзянь ковкерьксесь – те минек ойме, эйсензе неяви кода ковтнень ды читнень эрзякс видсте ёвтамондо. «Пондельник серёда марто» те ауль «понедельник со средой» эрзякс, видсте – «атяньчи, ды куншкачи». Эрзянь 2007 иень ковкерьксенть кармить максозь минек Покш читне, коли ютавтовить, ды кодат. Эрзятнене эряви минек койтнень содамс!
? - Зняро питне кис рамави?
ЭВ: Питнензэ вансынек: арсян, 15-20 целковойть. Рамсемань кис саезь ярмактне туить Раськень Озксос, «Руця» оршамонь пелькстамонть ютавтомазонзо. Несынк, кавто нумолот-тевть лисить, - эрзянь ковкерьксесь карми кудосо, ды минек коенек карми лездазь, ютавтозь парсте.
? – Вежай, евтак, кодамо валмелькс (слоган ) марто сюлмат од 2007 иень ковкерьксенть? Улить кодаткак арсемат?
ЭВ: Эрзя, муить ундоксот! (Эрзя, найди свои корни! ) Неть валтнэ кармить ковкерьксэнть вере чиресэнзэ. Арсян те валмельксесь карми васенце тевекс, оймеёжокс эрзятнень сы иесенть, - содадо карми ютавтовомо медьковонь омоце шлямочисте Чукалвелесе, Игнатбуень Эрзянь Масторсо – Раськень Озкс, сон карми колмоце неень шкань эрямосонть. Секс, эрьвата эрзянь оймесь, арсян муевлизеть ундондо! Од Ие марто, од тев марто, эрзят, минек ялгат!!!
? - Сюкпря, Вежай Чиряз кортамонть кис, паро валтнень-арсематнень кис! Карматан учеме од 2007 иень Ковкерьксенть! Арсян, сон карми штатолокс паломо минек эрзянь кудотнева.
© Петрянь Андю,
