Петрянь Андю (erzianj_jurnal) wrote,
Петрянь Андю
erzianj_jurnal

Categories:

МАСТОРАВА

   Шумбрачи, «Масторавань» ловныцят! Евтынк меленк минек валморонть эйсте. Прядан «Масторавань» васеньце пелькстенть валморотнень. Ней ловнодо: Коень каладомадонть, ды Комолявадо. Кармить кевкснимат –сермадодо. Учан.
Здравствуйте, читатели «Масторавы»! Скажи ваше мнение о нашем эпосе. Заканчиваю печатать первую часть эпоса «Масторава». Сейчас читайте: Разрущение обычеев (традиций), и о Камоляве. Будут вопросы – пишите. Жду.
   

КОЕНЬ КАЛАДОМА

Кезэрень пингстэ Инешкипазонь
Эрямонь юрось, аштемань таркась
Неень шкань коряс седе мала соль.
Кудо прясто кедь менелев сатыль,
Бути венстязель — верев кепедезь.
Кармильть кезэрень эрзят озномо,
Сыргильть сынь чачи сюро вешеме,
Покш паксяв лисильть, лисьма чирес стильть.
Неилинзе сынст Инешкипазост,
Марилинзе сынст мелень ваныцяст.
Паниль сыненст сон раужо пельне,
Нолдыль менельстэ сэтьме пиземне.
Чачи сюрось сынст парсте чачокшныль.
Вачо пекине эрзят эзть сода.
Тинге пиретне пултсо эцезельть,
Ульнесть утомост пештязь сюродо.
Апак учо те эрямось каладсь,
Вейке чистэ те парочись колавсь.
Весть каштомонзо ава уштызе,
Ваны — качамось верев а кузи,
Каштомварява ушов а лиси.
Равжо сельмензэ аванть аварьгадсть,
Лавшо кежензэ аванть эзть кирдевть.
Арси авинесь Пазонть мурнеме,
Снартни авинесь Пазонть севномо,
Мекс менелезэ овсе алкине,
Масторонть эйстэ ашти маласо.
Синдень чекине ава саекшнесь,
Сэрей кустема ава аравтнесь,
Кудонзо принес ава кузекшнесь.
Пазонть севномо ава кармакшнось.
Ушодсь чекесэ сонзэ нерькстнеме.
Эзь кирде Пазонть чевте корозо.
Кепедизе сон менеленть верев,
Седе васолонь таркас путызе,
Тосо тейсь лият паро кудот-чить.
Эрзятне фатясть — Пазось верев тусь.
Пурнасть велень промкс, арсить, мелявтыть.
— Мекс, Инешкипаз, минек кадымизь?
Мезть ней тейнеме минь карматано?
Чачи сюронок лотки чачомсто,
Ней вачо пеке кирдемс миненек.
Эряви, эрзят, озномс Пазонтень.
Адядо велень озкске тейтяно,
Инешкипазнэнь сюконятано
Чачи сюронок чачоманзо кис,
Вачо пекенек пештямонзо кис.
Раськетне ушов стольне таргакшность,
Шумбра кшине сынь столь лангс путокшность.
Мейле кирвастизь валдо штатолост,
Инешкипазнэнь кармасть озномо.
— Мекс, Инешкипаз, минек кадымизь?
Мекс седе верев кудот кепедик?..
Инешкипазось озксонть неизе,
Эрзянь ознома валтнэнь маринзе.
Нейке тердизе Веленьпазонть сон,
Кучизе сонзэ Эрзянь масторов.
— Сисем иеть тон эрзянь покш улят,
Коданя арсят, истя ютксост тейть.
Эрзянь масторов Веленьпазось сась.
Мель яви-пачти сон эрзятненень:
— Кунсолодо мезть, эрзят, мон мерян.
Содадо, мезе тыненк мон евтан.
Пазонь кучовт мон улян ломанесь.
Инешкипазось озксонк неизе,
Паро ознома валонк маринзе.
Тыненк лездамо сон монь кучимим.
Сисем иеть тынк ветицякс улян.
Карми тынк яла сюронк чачомо,
А сави кирдемс тенк вачо пеке.
Абунгадокшность озксонь эрзятне.
Пазонь кучовтонть кевкстнить-киведить:
— Евтака, ки тон улят ломанесь?
— Инешкинь улян, эрзят, церазо.
Веленьпазось мон, велень кирдицясь.
Вейке вайгельсэ эрзят ранкстакшность,
Вейке вайгельсэ эрзят пшкадекшнесть:
— Улиндерят тон, Пазонть церазо,
Улиндерят тон, велень кирдицясь —
Карматано Паз эрьгакс* вечкеметь,
Ен мелень кирдезь, тонь кунсоломот.
Кумажине лангс эрзятне пульзясть,
Сюконясть Пазонь сынь кучовтонтень:
— Кирдицянок тон минек ультяя!
Ванстыцянок тон минек ультяя!
Яки масторга Пазонь кучовтось —
Велева-сядга, паксява, вирьга,
Ломантненень тевть тееме лезды,
Эрьва мезес эйсэст сон тонавты.
Секс кезэртненень ульнесь пек шожда
Пингень печтямось, пароль эрямось.
Нама, лия шкась, прок пиже тундось,
Канды лия койть, максы од ила.
Сон ташто лувонть допрок калавтсы.



КОМОЛЯВА

Комолява Мастор лангс чачокшнось,
Комолява Мастор лангс касокшнось.
Козонь Комолявинесь чачокшнось?
Козонь Комолявинесь касокшнось?
Пиже лугас, мазый таркас чачнось,
Луга куншкас, каль ундокскес каснось.
Каль перька Комолява тапардавсь,
Каль принес Комолява кузекшнесь.
Рукшнат-рукшнат Комлявань лопанзо,
Мокшнат-мокшнат Комлявань шишканзо.
Ки муизе Комлявань, саизе?
Эрзянь ава Комлявань муизе,
Видьме руцяс Комлявань кочкизе,
Кудов-чив Комолявань кандызе,
Коник алов Комлявань путызе,
Чинь-чоп сон коник ало кирдизе.
Вийнес-валнэс Комлява совакшнось.
Коник алдо Комлявань таргизе,
Каштом ланга Комлявань сравтызе,
Каштом лангсо Комлявань костизе,
Покш котелсо Комлявань пидизе...
Мазыйнестэ Комлява наряжась,
Тусь ушова Комлява якамо.
Ашо паля Комлявань лангсонзо,
Парсей паця Комлявань прясонзо.
Сиянь уналкс* Комлявань мештьсэ,
Паро каркске Комлявань перька.
Яки-паки Комлява ушова,
Лиси-сови Комлява кудова.
Норовавань Комлява вастызе.
Лыткат-латкат Норовавань лангсо,
Гуйнасо Норовава, гайнасо*.
Комлява Норовавань кевкстизе:
Мекс лыткасат, Норовне, латкасат?
Мекс гуйнасат, Норовне, гайнасат?
Мекс апак шля, Норовава, чамат,
Апак судря, Норовава, тонь прят?
Арась виськсэть, Норовне, ломанде.
Минеть-сюнот якат тон ушова.
Ломанть ванныть, Норовне, лангозот,
Весе сюдыть, Норовава, эйсэть.
Кунсолынь мон, Комлява, тонь валот,
Кор саимим, Комлява, седейга,
Покордавинь, Комлява, сень эйсэ.
Нузякс ломань, Комлява, теть мерян,
Нузякс ломань, Комлява, тон улят.
Секс лыткасан, Комлява, латкасан,
Секс гуйнасан, Комлява, гайнасан:
Валске рана, нузякс ломань, мон стян,
Чокшне поздас, Комлява, а мадян.
Эрьва тевенть, нузякс ломань, тейса,
Эрьва тарканть, Комлява, пештяса.
Весе монень, Комлява, сюконить,
Весе монень, Комлява, энялдыть.
Вачо пекень, Комлява, андыцян,
Штапо лангонь, Комлява, оршицян.
Секс мазыйстэ, Комлява, а якан,
Парсей паля, Комлява, а кантнян.
«Нузякс» валсонть Комлява покордавсь,
«Нузякс» валсонть Комлява досадявсь.
—Мейс тон пря шнат, лытка ава, истя?
Мейс пря невтят, Норовне, сэрейстэ?
Куш мон якан, Норовне, мазыйстэ,
Куш мон пакан, Норовне, ашосто,
Эсень тевнем а кадса, а стувтса,
Эсень тевнем мон паросто тейса.
Симинь кудос, лытка ава, сован,
Эзем принес, гуйна ава, озан,
Симинь-ярсынь прято превнеть саян.
Васень тевнем — веселгавтсынь чачост,
Омботькс тевнем — мазыйстэ моравтсынь,
Колмотькс тевнем — дубордозь киштевтьсынь,
Нилетькс тевнем — вадрясто севновтсынь,
Вететькс тевнем — кежейстэ тюревтьсынь...


Кармасть ломанть ней пуре симнеме,
Лоткасть эрзят Пазонь мель ваномо.
Пазонь кучовтонть сынь а кунсолыть,
Берянь тевень тееме а пелить.
Оргодсь Веленьпазось — сынст кадынзе, Инешкипазонтень сась, евтнинзе:
— Кезэрь эрзянь илынесь калады,
Эрзянь кезэрь тувталост лужады.
Вечки эрзя симемат-ярсамот,
Стувты сон озксонь канстонь кандомат...


Масторава мельсапарос каявсь,
Масторава прась пек стака мелявксс.
Кува яки-паки сон — аварди,
Кува яки-паки сон — сюморды.
Ки неизе — аварди-сюморды?
Ки редизе — сюморды-мелявты?
Ашо локсей неизе-редизе.
Пазонь нармунесь сонзэ кевкстизе:
— Мейс истя, Масторава, авардят?
Мейс истя, Масторава, сюмордат?
— Секс мон, Ашо локсейне, авардян,
Секс мон, Пазонь кучовтке, сюмордан:
Сюро видить эрзят — сон а чачи,
Кильдемат трить — кильдемаст а раштыть,
Полат саить — полынест а шкить-трить.
Те пингень раське пек соды-мели*,
Те пингень раське Комлявань вечки.
— И ля аварде тон, Масторава!
Иля сюмордо, Масторавине!
Инешкипаз мелявты тень кисэ,
Инешкипаз сюморды тень кисэ.
Керш кедьсэнзэ сон уцяска кирди,
Вить кедьсэнзэ сон уцяска явши.
Евты вал — сюрось карми чачомо,
Яви мель — полат кармить шкить-трямо,
Кильдемаст, ракшаст кармить раштамо.

Гуйнат-гайнат — тувонь ало ацамот
Соды-мели — теи апаронь тевть
Полатксозо моли…
   © А.М. Шаронов, 1994 ие
Tags: Масторава (эпос "Масторава" ), фолк, эрзя, эрзякс сермадозь (написанное на эрз.)
Subscribe

  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 24 comments